اللهم اجعلنا من عبادك المخْلَصِين

بقلم محمد منصور

“وَلَقَدْ هَمَّتْ بِهِ وَهَمَّ بِهَا لَوْلا أَنْ رَأَى بُرْهَانَ رَبِّهِ كَذَلِكَ لِنَصْرِفَ عَنْهُ السُّوءَ وَالْفَحْشَاءَ إِنَّهُ مِنْ عِبَادِنَا الْمُخْلَصِينَ” يوسف (24)

اد ايه الآية دي عظيمة واد ايه فيها بلاغة واعجاز القرآن الكريم حاول تقرأها مرة قبل ما تشوف التفسير وبعد ما تشوف تفسيرها اقرأها تاني هتحس بمتعة القرآن واللغة العربية 😊

ربنا سبحانه وتعالى بيقول “ولقد همت به..”
الهم : هو حديث النفس بالشئ وممكن يفعل او ميفعلش عشان كده من رحمة الله بخلقه من هم بسيئة ولم يفعلها كتبت له حسنة
نرجع تاني للآية ربنا بيقول “ولقد همت به وهم بها..”
يعني امرأة العزيز خلاص همت انها تقرب لسيدنا يوسف وتراوضه عن نفسه لارتكاب الفاحشة ايه اللي بعد كده ؟ ممكن واحد يقولي ده القرآن بيقول “وهم بها” يعني سيدنا يوسف عمل زيها وارتكب الفاحشة ؟ ولا القرآن اللي غلط ؟! اقوله لا استنى ياعم الحاج حاشاه أن يكون به خطأ افهم الآية وكملها للآخر ربنا بيقول ” ولقد همت به وهم بها لولا أن رأى برهان ربه”
كلمة “لولا” دي هي الزتونة 😃 اربع حروف بس هما اهم اربع حروف عشان تفهم الآية صح
وكلمة “لولا” دي بيسموها حرف امتناع لوجود تمنع الفعل لوجود شئ يعني مثلا “خرجت من البيت لولا المطر” يعني انا مخرجتش من البيت عشان المطر اصلها “لولا المطر لخرجت من البيت”
كذلك الآيه أصلها “لولا ان رأى برهان ربه لهم بها”
معنى كده ان البرهان منع سيدنا يوسف انه يهم بها
واحد يقولي طب ما ربنا كان يقول “ولقد همت به ولم يهم بها” على الاقل اسهل من اللفة الطويلة دي 😕
أقوله شوف كلام ربنا الجميل ومعجزات القرآن اللغوية
ربنا لو كان قال كده كان هيتفهم انه لم يهم بها لاي سبب اخر ممكن يكون لعدم عفية يوسف او يمكن يكون لعدم رجولته او فحولته لكن شوف ربنا بقى قالك ايه “ولقد همت به وهم بها لولا أن رأى برهان ربه” يعني سيدنا يوسف رجل كامل الرجولة والفحولة وكامل العفة وممكن يهم بها كأي رجل اخر لكن قال لولا أن رأى برهان ربه
وربنا وراله ما يثبته ويمنعه من فعل الفاحشة.

“كذلك لنصرف عنه السوء والفحشاء”
طيب احنا متفقين ان الفحشاء هي الزنا ما كان ممكن يقول “لنصرف عنه الفحشاء” وخلاص ما هو ده اللي امرأة العزيز كانت عاوزاه شوف ربنا وحكمته ورحمته بسيدنا يوسف قالك السوء ده هو اي افتراء او ابتلاء قد يحدث اذا لم يرى يوسف برهان ربه كان ممكن يقتلها او تفتري عليه بانه حاول يقتلها فيتسجن او يعدم فربنا كان رحيم بيه وقال لنصرف عنه السوء والفحشاء.

“إنه من عبادنا الْمُخْلَصِينَ” والمخلصين بفتح اللام وليس بكسرها فرق كبير جدا بين الاتنين :
المخلص : جاهد فكسب يعني هو الشخص اللي وصل ف طاعة الله الى كرامة الله.
الْمُخْلَص : كسب فجاهد هو الشخص اللي ربنا اختاره واصطفاه واكرمه واطاع الله.
عشان كده الشيطان قال لربنا “وعزتك وجلالك لأغوينهم أجمعين إلا عبادك منهم الْمُخْلَصِينَ” وليس المخلصين يعني اللي ربنا اختارهم واصطفاهم هما دول اللي ف عناية ورعاية الله بعيد عن الشيطان عشان كده ربنا حفظ سيدنا يوسف من كيد النسوة ومن الفاحشة والسوء..
عشان كده اللي ربنا معاه ميخافش من اي حاجة حتى لو انتا مكنتش من اللي ربنا اصطفاهم حاول تكون منهم واجعل لنفسك مكان بينهم بطاعة الله خليك لحوح في الدعاء ربنا بيحب كده ادعي كتير وقول يارب هو سامعك ومعاك ف أي مكان وسيبك من البشر “ويمكرون ويمكر الله والله خير الماكرين” مهما حاول البشر انهم يؤذوك ترتيبات ربنا اعلى واكبر من ترتيبات عباده..
اللهم اجعلنا من عبادك الْمُخْلَصِينَ اللهم امين 👐